ناس كتيرة اتفاجئت لما المحامي فريد الديب أعلن دفاعه عن قاتل فتاة المنصورة نيرة أشرف، وقالوا إزاي هيعمل كدا وهو اتحكم عليه بالاعدام وخلاص مفيش ثغرة واحده يبرأ منها المتهم.
إلا أن الكلام ده مش صح ولسه في فرصة كبيرة قدام المتهم لتخفيف الحكم وممكن كمان يطلع براءة، واكبر دليل على كده ان فريد الديب أعلن إنه هيتولى القضية، لأن الراجل ده مش هيغامر بتاريخه كله عشان قضية خسرانه.
نيجي بقى للدليل القانوني هو إنه مفيش استئناف على حكم الإعدام لكن في نقض، وفي حالة عدم تقدم محامي المتهم بنقض على الحكم، النيابة نفسها هتقدم بنقض على الحكم، لأن حكم الإعدام لازم يخضع لإجماع آراء دائرة الجنايات وكمان رقابة محكمة النقض.
أما دور محكمة النقض بالنسبة للأحكام بصفة عامة هو انها بتراجع الحكم الصادر
وبتحدد ما إذا كان الشخص يستحق الإعدام فعلا ولا لا
وليها الحق في أنها تحكم
ببطلان الحكم وترجع القضية للمحكمة عشان تحكم فيها من البداية
القضية هتدخل مرحلة جديدة الفترة الجاية خاصة بعد ما أعلن مرتضى منصور دفاعه عن نيرة أشرف، ومش بعيد نشوف معركة قضائية تاريخية.
مرتضي منصور قال في تصريحات صحفية ان نيرة أشرف، طالبة المنصورة، ذُبِحَت مرتين، المرة الأولى؛ كانت في الشارع أمام حرم جامعتها والمواطنين، والمرة الثانية؛ لما خاض البعض في سمعتها وعرضها، وتعاطفوا مع المتهم القاتل الذي نفَّذ جريمته قدام كل المواطنين في الشارع.